Të dashur studentë të Universitetit Western Balkans,
Si Dekane e Studentëve, jam shumë e lumtur dhe e emocionuar që kam mundësinë t’ju drejtohem të gjithëve ju. Dua t’ju njoftoj se duke filluar nga sot, jeni pjesë e Komunitetit të Universitetit Western Balkans.
Kapacitetet dhe aftësitë tuaja tregojnë qartazi se secili prej jush ka shumë për të dhënë dhe për të ndarë me të gjithë ne.
Në mesin tuaj nuk ka vetëm mjekë të ardhshëm, dentistë, shkencëtarë, teknikë mjekësorë, sipërmarrës të ardhshëm, apo ekspertë të teknologjisë dhe informacionit. Në mesin tuaj ka artistë, sportdashës, eksplorues, hulumtues, njerëz me shpirt të madh, dhe qytetarë të angazhuar.
Ne nuk dëshirojmë që ju të lini të gjitha këto cilësi në hije, por t'i zhvilloni dhe t'i pasuroni ato; në këtë mënyrë, ju pasuroni komunitetin tonë të Universitetit Western Balkans dhe shoqërinë tonë gjithashtu.
Ne nuk dëshirojmë që ju të lini pas komunitetin nga ju vini. Merrni atë komunitet me vete në auditore, pasi në të njëjtë kohë do të merrni në me vete vlerat e komunitetit tonë të përbashkët në shtëpitë tuaja. Shkëmbimi i përvojave, pikëpamjeve, arritjeve, dhe ëndrrave do të na bëjë më të fortë dhe më të plotë.
Dua gjithashtu t’ju siguroj se udhëtimi që ne fillojmë do të jetë sfidues dhe në disa raste jo i lehtë. Siç na ka mësuar përvoja e jetës: "Sukseset më të mëdha vijnë nga liria për të dështuar". Jepini vetes atë liri, por kurrë mos u dorëzoni, provoni përsëri, mësoni vazhdimisht, ëndërroni shumë, dhe suksesi do të jetë i juaji.
Mos harroni kurrë se: "Ata njerëz që zhvillojnë aftësinë për të përvetësuar vazhdimisht forma të reja dhe më të mira të njohurive, të cilat mund t'i aplikojnë në punën dhe jetën e tyre, do të jenë në rolin e udhëheqësve në shoqërinë tonë në të ardhmen". Nga ana jonë, ju sigurojmë se ne jemi dhe do të jemi gjithmonë pranë jush.
Dua që ju të dini se askush prej nesh i vetëm nuk ka të gjitha përgjigjet, por nëse punojmë të gjithë së bashku ne mundemi të gjejmë të gjitha përgjigjet dhe të zhvillojmë një frymë të re në arsim. Misioni ynë është të krijojmë ndikimin tonë në botë. Mund të fillojmë që sot të angazhohemi më aktivisht me botën që na rrethon dhe nesër mund të shkojmë shumë përtej se kaq.
Besojeni, të gjithë ju jeni pjesë e Komunitetit të Universitetit Western Balkans dhe mezi pres të zbuloj ngjyrat që ju do ti shtoni. Ju uroj të gjithëve më të mirat!